昨日放早，

唔夠十一點就返到屋企，好爽！

又多咗同阿仔嘅親子時間喇~~~

呢個仔玩車時花款多多，

呢排鍾意趷高pat pat 同車車「穿山窿」~~~

晚上去同事嘅farewell dinner，

昕顥出發前又要去推BB車，

都唔明佢做乜咁鍾意推車...

明明出門口時仲因為有街街去超興奮，

但一去到潮館就好moody，

全程唔笑、唔多肯跟人同要痴住媽咪...

初時雖然唔肯笑，

但都可以俾代父、Uncle Edmund & Auntie Nancy 抱住影吓相。

後來Uncle King Yuen 嘅出現令昕顥B連僅有嗰份冷靜都冇埋，

阿仔一見到佢即刻扁咀、谷眼淚，

再擰轉面伏喺媽咪膊頭度避開佢。

唔通阿仔真係記得呢個叔叔曾經整喊過佢？

返到屋企心情都唔太好，

冇乜表情咁自己坐喺地台度玩...

今日BB嘅心情時好時壞，

去爺爺嫲嫲度前就玩波波玩得好開心~~~

最初去到爺爺屋企都自己乖乖哋玩，

但到後來又變咗樹熊仔要痴住媽咪，

平時好鍾意跟爺爺嘅佢忽然連爺爺都唔肯跟...

返到屋企又ok 喎，

又喺地台度玩車，

冇再扭計喇！

早幾日幫阿仔時見到佢牙肉又紅又腫，

摸落去拮拮哋，

應該係吽出兩隻大牙仔。

希望佢呢幾日咁反常係因為牙肉腫痛，

而唔係突然變曳咗啦，

冇理由一下子性情大變嘛...

今晚阿哥同阿妹出發去日本 喇，

期待佢哋嘅戰利品！